Шифокор-ходимлар учун янги автобус йўналиши ишга туширилади
Ижтимоий тармоқларда Ихтисослаштирилган юқумли касалликлар шифохонасининг вақтинчалик кўчирилганлиги ходимларга ноқулайлик туғдираётгани ҳақида хабарлар тарқалди.
Facebook ижтимоий тармоғида Ихтисослаштирилган юқумли касалликлар шифохонаси вақтинчалик кўчирилганлиги ва жамоат транспорти мавжуд бўлмаганлиги ходимларга ноқулайлик туғдираётганлиги тўғрисида хабарлар тарқалганди. Ушбу ҳолат юзасидан Санитария-эпидемиология қўмитаси маълумот берди.
Яъни, амалий ёрдам сўраб, Транспорт вазирлигига мурожаат қилинди.
Натижада 2-сон Зангиота юқумли касалликлар шифохонасига янги шаҳар жамоат транспорти йўналишини ташкил этиш бўйича Тошкент шаҳар транспорт бош бошқармаси ва Тошкент вилояти транспорт бошқармаси мутасадди ходимлари томонидан атрофлича ўрганиш ишлари олиб борилди.
Ўрганиш натижасига кўра, шифохонадан 5-метро бекатигача бўлган масофа 6,9 кмни ташкил этаётганлиги, шифохонага келиб-кетаётган ишчи-ходимларга ноқулайликлар юзага келаётганлиги сабабли янги автобус йўналишини ташкил этиш мақсадга мувофиқлиги маълум бўлди.
"Тошкент шаҳар транспорт бош бошқармаси берган маълумотига кўра, ҳозирги кунда метро бекатидан Зангиотадаги клиникага қадар 154-сонли йўналиш ишлаб чиқилиб, тендерга қўйилган. Йўналиш тендер ўтказилгандан сўнг 21 мартгача ишга туширилади", дейилади хабарда.
