Намангандаги масжидда эҳсон қутисидаги пуллар ўғирланди
Маълум бўлишича, буни 4 нафар ўспирин содир этган.
Наманган вилоятининг Чуст туманида 26 апрель куни масжид ёнидаги эҳсон қутиси ичида бўлган пуллар ўғирлаб кетилди. Бу ҳақда вилоят ИИБ ахборот хизмати хабар берди.
Ҳолат Чуст туман «Садача» МФЙ ҳудудида жойлашган “Катта боғ” жоме масжиди ёнида юз берган. 26 апрелдан 27 апрелга ўтар кечаси номаълум шахслар масжид ташқарисида жойлашган эҳсон қутисини бузиб очиб, унинг ичида бўлган тахминан 3 мл сўм пулларни олиб қочган.
Олиб борилган тезкор қидирув ишлари давомида эҳсон қутиси ичидаги пулларни Чуст туманда яшовчи 2006 йилда туғилган 4 нафар вояга етмаган шахслар олиб қочганлиги аниқланган. Уларнинг ёнидан бир юз саксон беш минг сўм миқдоридаги пуллар ашёвий далил сифатида олинган. Ҳозирда терговга қадар текширув ишлари олиб борилмоқда.
