Ахборот кодексининг янги лойиҳаси журналистлар иштирокида муҳокама қилинди

 

Адлия вазирлиги, Юристлар малакасини ошириш маркази ташаббуси билан АОКА ҳамкорлигида ОАВ вакиллари, журналист ва блогерлар учун “Ислоҳотлар даврида оммавий ахборот воситаларининг роли, журналистларнинг ахборот тарқатишдаги ҳуқуқ ва мажбуриятлари” мавзусида давра суҳбати ташкил этилди.

 

Давра суҳбатида ташкилотчи идора мутасаддилари, профессор-ўқитувчилар ҳамда ОАВ мутахассислари ва ҳуқуқшунослик экспертлар тренинг-машғулотлари ўтказишди.

 

Тадбирда асосий эътибор ахборот тарқатишда ишончли манбага таяниш, журналист этикасига риоя қилиш, шунингдек, шахсга оид маълумотларни тақдим этишда қонунчилик доирасидан чиқмаслик, айбсизлик презумциясига амал қилиш ва бошқа қатор долзарб масалаларга қаратилди.

 

Очиқ мулоқот давомида АОКА масъул ходимлари янги Ахборот кодекси лойиҳаси ва унда кутилаётган ўзгаришлар ҳақида батафсил маълумот беришди.

 

Соҳа вакиллари, журналист ва блогерлар билан ахборот соҳасида касб масъулиятининг чегаралари, журналистик фаолиятни тартибга солувчи ҳуқуқий ва этик нормалар, замонавий медиага хос ва мос ишлаш механизмларига ўтиш, инсон онгига салбий таъсир кўрсатувчи ахборот тарқатишдан чекланиш, аҳолининг ОАВ орқали ишончли ва ҳаққоний ахборотни олиш ҳуқуқини бузиш ҳолатларининг олдини олиш масалалари кенг муҳокама қилинди.

 

Шунингдек, учрашувда ёлғон хабар тарқатишда қўлланиладиган жавобгарлик турлари, ахборот олиш ва узатиш эркинлиги ҳамда кафолатлари, журналист шаъни ва ҳуқуқининг ҳимояланишига оид саволларга жавоб берилди.

 

Давра суҳбати оммавий ахборот воситалари ходимлари, журналист ва блогерлар фаолиятларига ҳуқуқий ёндашиш жиҳатдан самарали бўлди.