«Хитой-Марказий Осиё» саммитида Афғонистон масаласи кўтарилди
Сиан шаҳрида Марказий Осиё президентлари иштирокидаги саммит ўз ишини бошлади.
Хитой Марказий Осиё давлатларига мудофаа қобилиятини мустаҳкамлашда ёрдам беришга тайёр. Бу ҳақда Хитой етакчиси Си Цзиньпин Сиан шаҳрида бўлиб ўтаётган «Хитой-Марказий Осиё» саммитида маълум қилди, деб ёзмоқда РИА Новости.
«Хитой Марказий Осиё давлатларига ҳуқуқ-тартибот ва мудофаа салоҳиятини мустаҳкамлашга ёрдам беришга, шунингдек, минтақавий хавфсизликни сақлаш ва терроризмга қарши курашиш борасидаги саъй-ҳаракатларини қўллаб-қувватлашга тайёр», — деди Си Цзиньпин.
Шунингдек, у Хитой Афғонистонни тинч йўл билан тиклашга кўмаклашишда давом этишини таъкидлади.
«Марказий Осиёнинг суверенитети, хавфсизлиги, мустақиллиги ва ҳудудий яхлитлиги сақланиши, Марказий Осиё халқи танлаган тараққиёт йўли ҳурмат қилиниши керак», — дея қўшимча қилди у.
Эслатиб ўтамиз, Хитойнинг Сиан шаҳрида «Хитой-Марказий Осиё» саммити бўлиб ўтмоқда. Унда Қозоғистон президенти Қасим Жомарт-Тоқаев, Қирғизистон президенти Садир Жапаров, Тожикистон президенти Эмомали Раҳмон ва Ўзбекистон президенти Шавкат Мирзиёевлар иштирок этишмоқда.
