Тошкентда эшак гўштидан сомса тайёрланаётгани айтилган хабарлар тарқалди

 

Ижтимоий тармоқларда Тошкент шаҳар Яккасарой туманида жойлашган сомса ва ош марказида Санитария-эпидемиологик осойишталик ва жамоат саломатлиги қўмитасининг Тошкент шаҳар бошқармаси ходимлари томонидан ўтказилган рейд жараёнида 128 килограмм эшак гўшти сақланаётгани фош қилинганлиги ҳақида хабар тарқалди. Ҳолат юзасидан Санитария-эпидемиология қўмитаси расмий маълумот берди.

 

Унга кўра, Санитария-эпидемиологик осойишталик ва жамоат саломатлиги қўмитасининг Тошкент шаҳар бошқармаси ходимлари томонидан айнан хабарда таъкидланган рейд тадбири ўтказилмаган ва ходимлар томонидан сомсахоналардан бирида эшак гўшти сақланаётгани аниқланди, деган хабарлар ҳеч қандай асосга эга эмаслиги таъкидланган.

 

Қайд этилишича, гўшт маҳсулотларининг сифатини ўрганиш ва сотувга чиқаришга рухсат бериш Санитария-эпидемиологик осойишталик ва жамоат саломатлиги қўмитасининг эмас, балки Ветеринария санитария экспертиза лабораторияси ваколатларига киради.