Эрдоғаннинг инаугурацияси маросими бўлиб ўтди
Тадбирда дунёнинг 78 давлатидан вакиллар, жумладан, 20 дан ортиқ давлат ва ҳукумат раҳбарлари қатнашган.
Анқарадаги Туркия парламенти биносида 3 июнь куни Туркия президенти Ражаб Таййиб Эрдоғаннинг қасамёд қилиш ва инаугурациясининг тантанали маросими бўлиб ўтди. Бу ҳақда агентлиги Anadolu хабар берди.
Қайд этилишича, маросим иштирокчилари орасида дунёнинг 78 давлати вакиллари, жумладан, 20 дан ортиқ давлат ва ҳукумат раҳбарлари қатнашган. Тадбир аввалида Туркия парламенти муваққат раиси Девлет Бахчели давлат раҳбарига президентлик сайловидаги ғалабадан далолат берувчи ҳужжатни топширди. Шундан кейин Эрдоған Туркия халқига қасамёд матнини ўқиб эшиттирган.
«Эрдоған инаугурация маросимидан сўнг Туркия Республикаси асосчиси Мустафо Камол Отатурк мақбарасига гулчамбар қўяди. Тантанали тадбирлар дастури Эрдоған табрикларни қабул қиладиган президентлик мажмуасида давом этади», — дейилади хабарда.
Шундан сўнг Туркия раҳбари Чанкая қароргоҳига йўл олади ва у ерда маросимга ташриф буюрган олий мартабали меҳмонлар шарафига расмий кечки зиёфат уюштирилади. Тадбирнинг охирги нуқтаси эса Туркиянинг қайта сайланган президенти мамлакатнинг янги ҳукумати таркибини эълон қиладиган брифинг бўлади.
Маълумот учун, 28 май куни бўлиб ўтган сайловларда қайтадан давлат раҳбари этиб сайланган президент Ражаб Таййиб Эрдоғаннинг ваколат муддати 2028 йилгача давом этади.
