Ўзбекистон ва Британия меҳнат миграцияси соҳасида ҳамкорликни кенгайтиради

 

Ўзбекистон ташқи ишлар вазирининг ўринбосари Ғайрат Фозилов Буюк Британия давлат котибининг ташқи ишлар, Ҳамдўстлик масалалари ва халқаро тараққиёт бўйича парламентар ўринбосари Лео Докерти билан музокаралар ўтказди.

ТИВ маълумотига кўра, суҳбат чоғида сиёсий, иқтисодий, савдо-инвестициявий, маданий-гуманитар, фан-таълим ва бошқа соҳалардаги икки томонлама ҳамкорликнинг кенг кўламли масалалари муҳокама қилинди. Бўлажак қўшма тадбирлар, жумладан, ТИВлараро сиёсий маслаҳатлашувларнинг навбатдаги раунди бўйича таклифлар кўриб чиқилди.

Буюк Британия томони Ўзбекистонда амалга оширилаётган, жамият ҳаётининг деярли барча жабҳаларини қамраб олган ижобий ўзгаришларни юқори баҳолаши таъкидланди.

 

Шунингдек, фойдаланилмаган улкан салоҳиятни тўлиқ рўёбга чиқариш мақсадида иқтисодий дипломатияни фаол ривожлантиришдан икки томон ҳам бирдек манфаатдор эканлиги қайд этилди.

 

Бундан ташқари, икки мамлакат ташқи сиёсат идоралари раҳбарлари ўринбосарлари меҳнат миграсияси соҳасидаги ҳамкорликни кенгайтириш, экологик йўналишдаги шерикликни мустаҳкамлаш масалалари, шунингдек, халқаро кун тартибининг айрим жиҳатларини ҳам муҳокама қилдилар.