Тошкентда ярим тунда киракашлик қилиб юрган йигитга босқинчилар ҳужум қилди

 

Маълум қилинишича, 7 июнь куни 24 ёшли эркак Тошкент тумани ИИБ бошлиғи номига ариза билан мурожаат қилган.

 

Унда шу куни соат 01:20 ларда Spark автомашинасида йўловчиларни ташиш билан шуғулланаётган вақтида, ТҲАЙнинг Тошкент шаҳри Юнусобод тумани И.Каримов маҳалласи ҳудудидан ўтган қисмидан йўловчи сифатида икки нафар номаълум аёл автомашинасига ўтириб, Қибрай тумани Парвоз маҳалласига олиб бориб қўйишини сўраганини билдирган.

 

Қайд этилишича, у мазкур маҳаллага борган вақтида, аёлларнинг таниши бўлган яна икки нафар номаълум эркак унинг автомашинасига чиққан ва уларни «Уч қаҳрамон» блокпости яқинидаги ички кўчага олиб борган вақтида, автомашинада йўловчи сифатида кетаётган икки нафар эркак унга пичоқ ўқталиб, қўллари билан уриб тан жароҳати етказган.

 

Сўнгра улар уни зўрлик ишлатиб автомашина орқа ўриндиғига ўтказган, улардан бири автомашина рул бошқарувига ўтирган, иккинчи эркак эса пичоқ ўқталиб орқа ўриндиқда олиб кетаётган вақтида ундан Redmi-5 телефон аппаратини ва қўлида бўлган соатини тортиб олган. Учтепа тумани ҳудудидаги автомобилларга ёқилғи қуйиш шохобчасига кирган вақтларида, у автомашинадан тушиб қочиб кетишига улгурган.

 

Тергов департаментининг маълум қилишича, мазкур ҳолат юзасидан олиб борилган тергов-тезкор ишлар натижасида, мазкур жиноятни 21 ёшли П.Ф. (эркак), 18 ёшли С.М.(аёл), 22 ёшли Н.Б. (эркак) ва 18 ёшли А.Ю. (аёл)лар содир этганликлари ҳамда жабрланувчига тегишли бўлган автомашинани Зангиота тумани Мустақиллик кўчасида жойлашган уйларнинг бири олдида ташлаб кетилганлиги аниқланган ва автомашина кўздан кечирилиб ашёвий далил тариқасида расмийлаштириб олинган.

 

Айбланувчиларга нисбатан «қамоққа олиш» тарзидаги эҳтиёт чораси қўлланилган. Шунингдек, ҳозирда юқоридаги шахслар нима сабабдан ушбу жиноятга қўл урганлиги юзасидан суриштирув ишлари олиб борилмоқда.