Қимматбаҳо мол-мулк учун солиқ жорий этиш таклиф қилинди

 

Халқ демократик партиясидан президентликка номзод Улуғбек Иноятов фарғоналик сайловчилар билан учрашди. Сиёсатчи ўз дастуридаги таклиф-ташаббуслар ҳақида атрофлича маълумот берди.

 

Хусусан, қимматбаҳо мол-мулк учун солиқ жорий этиш, бунда миқдори қонун билан белгилангандан юқори уй-жой, автотранспорт ёки бошқа мол-мулк мулкдорларидан ушбу солиқнинг ундирилишини назарда тутиш таклиф этилмоқда.

 

Бундан ташқари, Улуғбек Иноятов таълим ва илм-фан билан боғлиқ қатор ташаббусларни ҳам илгари сурмоқда:

 

• мактаблар ўқув дастурларида чет тиллари ва IТ бўйича ўқув соатларини кескин кўпайтириш;

 

• мактаб ўқувчилари учун жамоат транспортларидан фойдаланишда табақалашган тарифларни жорий қилиш;

 

• талабаларнинг дарсни ўзлаштириши ва уларнинг инновацион фаолиятда иштирокига қараб, стипендиялар миқдорини белгилаш;

 

• турар жой ижараси учун компенсация тизимини докторантларга нисбатан ҳам жорий этиш;

 

• олис қишлоқлардаги болалар учун мўлжалланган маданият муассасалари, спорт иншоотлари, “Баркамол авлод” марказлари, мусиқа ва санъат мактабларининг фаолиятини янада ривожлантириш.