Чечен жангчилари «Вагнер»га қарши курашиш учун тўқнашув чизиқларига жойлаштирилмоқда
Рамзан Қодиров ҳозирда Россияда содир бўлаётган воқеалар қонли оқибатларга олиб келиши мумкинлигидан огоҳлантирди.
Чеченистон раҳбари Рамзан Қодиров «Вагнер» жангчилари томонидан Россиядаги бир қатор муҳим инфратузилма обектларини эгаллаб олинаётгани ҳамда Москва томон ҳаракатланаётган ёлланма аскарлар ҳақидаги воқеаларга муносабат билдирди.
Рамзан Қодировнинг айтишича, чечен жангчилари ёлланмас аскарларга қарши курашиш учун аллақачон тўқнашув чизиқларига юборилмоқда.
«Бўлаётган воқеалар Мудофаа вазирлигига ултиматум эмас. Бу давлатга даъват бўлиб, бу даъватга қарши миллий лидер атрофида бирлашиш зарур: ҳарбийлар, хавфсизлик кучлари, губернаторлар ва тинч аҳоли. Мудофаа вазирлиги ва Россия гвардиясининг Чеченистондаги жангчилари аллақачон кескинлик зоналарига жўнаб кетишган. Биз Россиянинг бирлигини сақлаш ва унинг давлатчилигини ҳимоя қилиш учун ҳамма нарсани қиламиз!
Тарих шуни кўрсатадики, бундай ҳаракатлар қонли оқибатларга олиб келиши мумкин. Қўзғолонни бостириш керак ва агар бу қаттиқ чораларни талаб қилса, биз тайёрмиз», — дейди Қодиров.
Шунингдек, Қодировнинг сўзларига кўра, Украинадаги уруш вақтида шахсий шикоятларни айтиш ва орадаги низоларни ҳал қилиш вақти эмас.
