Хоразмда ҳайдовчи маст ҳолда ИИБ бошлиғини уриб юборди
Жабрланувчи оғир аҳволда шифохонага ётқизилган.
Маълум қилинишича, 25 июндан 26 июнга ўтар кечаси 1993 йилда туғилган damas ҳайдовчиси Хоразм вилояти Хива шаҳар ИИБ бошлиғи подполковник Ботир Отажоновни уриб юборган. Оқибатда жабрланувчи йўл четида турган автомобилнинг орқа томонига бориб урилиб, тан жароҳати олган. Аммо, ҳайдовчи Damas автомашинасини ҳодиса жойида қолдириб, номаълум томонга яширинган.
Олиб борилган тезкор-қидирув ишлари натижасида, ҳайдовчининг яширинган жойи аниқланиб, алкотестер ёрдамида кўрикдан ўтказилганда унда 0,403 мг/л миқдорида алкоголдан мастлик ҳолати аниқланган.
Бош прокуратуранинг хабар беришича, ҳолати юзасидан Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Ҳозирда тергов ҳаракатлари олиб борилмоқда.
