Канализация чуқури ўпирилиши оқибатида фуқаро тупроқ остида қолди
Тошкент шаҳар ФВБ Мирзо Улуғбек тумани содир бўлган воқеа тафсилотлари ҳақида маълумот берди.
Кеча, 9 июль куни соат 19:13 ларда Мирзо Улуғбек тумани, Олтинтепа кўчасида жойлашган хонадонларнинг бирида фуқаронинг тупроқ остида қолиб кетгани бўйича Тошкент шаҳар Фавқулодда вазиятлар бошқармасига хабар келиб тушган.
Қайд этилишича, уй эгалари томонидан канализация қувурини таъмирлаш мақсадида қазилган чуқур ўпирилган ҳамда бир фуқаро тупроқ остида қолган.
Шунга кўра, зудлик билан олиб борилган ҳаракатлар натижасида фуқаро хавфсиз жойга олиб чиқилган ҳамда тез тиббий ёрдам хизмати ходимларига топширилган.
Маълум қилинишича, айни вақтда фуқаронинг аҳволи яхши.
