Ўзбекистонда ўртача умр кўриш давомийлиги 74 ёшга етди
Шунингдек, ҳар 100 минг туғилган чақалоққа нисбатан оналар ўлими 1,5 марта камайди
Иқтисодий тадқиқотлар ва ислоҳотлар маркази мутахассислари Ўзбекистонда соғлиқни сақлаш соҳасининг 2017-2022 йиллардаги ривожланишини таҳлил қилди.
Таъкидланишича, 2017 йилда Ўзбекистонда ўртача умр кўриш давомийлиги 73 ёшни ташкил этган бўлса, 2022 йилга келиб бу кўрсаткич 74 ёшга етди. Жумладан, аёлларнинг ўртача умр давомийлиги 77 ёш, эркакларники 72 ёшни ташкил этди.
Бундан ташқари, ҳар 100 минг туғилган чақалоққа нисбатан оналар ўлими 1,5 марта, 5 ёшгача болалар ўлими 1,4 марта, неонатал ўлимлар 1,7 мартага камайишига эришилди.
Шунингдек, болаларни эмлаш талаб даражасида йўлга қўйилганлиги натижасида қатор юқумли касалликларнинг тугатилишига ёки кескин камайишига эришилди. Жумладан, Жаҳон соғлиқни сақлаш ташкилотининг Ўзбекистон полиомиелит касаллигидан холи ҳудуд, безгак (малярия) касаллиги тугатилганлиги тўғрисида сертификати, Европа регионал бюросига аъзо бўлган 53 та давлатлар ичида олтинчи бўлиб «Ўзбекистонда қизамиқ ва қизилча касаллиги элиминация қилинганлиги тўғрисида»ги тегишли ҳужжати олинди.
