Қарши ҳокими ўзини рағбатлантиришга 75 млн ажратди
Шаҳар ҳокимлиги ҳолатга изоҳ берди.
Қарши шаҳри ҳокими Нормўмин Холбоев ўзини рағбатлантириш учун 75 миллион сўм маблағ ажратиш ҳақида қарор чиқарди. “E-qaror” электрон тизимига жойлаштирилган мазкур ҳужжат 2023 йилнинг 25 август куни шаҳар ҳокими Нормўмин Холбоев томонидан имзоланган.
“Қарши шаҳар ҳокимлигининг харажатларига маблағ ажратиш тўғрисида”ги қарорда ҳокимликнинг 2023 йилдаги захира жамғармаси маблағлари ҳисобидан вилоят миқёсида “Энг ташаббускор сектор” дея эътироф этилган 1-сектор раҳбарини рағбатлантириш харажатларига 75 миллион сўм маблағ ажратиш лозимлиги ёзилган.
“Вазирлар Маҳкамасининг 2021 йил 23 августдаги 536-сонли қарори ва Ўзбекистон Республикаси президенти ҳузуридаги давлат хизматини ривожлантириш агентлигининг 2023 йил 16 февралдаги алоқа хати ижросини таъминлаш мақсадида, шунингдек, вилоят ҳокимлигининг 2023 йил 24 августдаги вилоятда “Энг ташаббускор сектор” деб эътироф этилган Қарши шаҳар 1-сектор раҳбарини маҳаллий бюджет маблағлари ҳисобидан рағбатлантириш тўғрисидаги кўрсатма хатига асосан 1-сектор раҳбарини рағбатлантириш харажатлари учун белгиланган тартибда маблағ ажратилгани маълум қилинади”, — дейилади ҳокимлик муносабатида.
