12 та боланинг бармоқ излари туширилган сурат — ҳозир болаларнинг биттасигина ҳаёт
Тошкент вилоятида бемор болаларнинг даволанишига ҳисса қўшиш мақсадида "Сен кучлисан!" ижтимоий акция ўтказилмоқда.
Нурафшон шаҳридаги Ёшлар марказида "Сен кучлисан" ижтимоий лойиҳаси доирасида ташкил этилган бемор болалар ижодига мансуб санъат асарлари кўргазмаси давом этмоқда.
Жумладан, болаларнинг даволанишига ҳисса қўшиш мақсадида Ёшлар ишлари агентлиги Тошкент вилояти бошқармаси туман-шаҳар бўлими бошлиқлари, ёшлар етакчилари ушбу кўргазма атрофида жам бўлди.
“Сен кучлисан” хайрия тадбири доирасида 100 нафардан ортиқ бемор бола томонидан чизилган 800 дан ортиқ сурат намойиш қилинди. Жараёнда болалар томонидан чизилган 15 та сурат аукционга қўйилди.
"Оғир дард билан курашиб келаётган болажонларга ва уларнинг яқинларига моддий ҳамда маънавий кўмак бериш мақсадида ташкил қилган мазкур акцияда жамоамиз ҳамда ҳудудлардаги ёшлар вакиллари билан иштирок этди. Бемор болажонлар чизган суратларга боқиб, улар орасидан катта иқтидор эгалари етишиб чиқишига умид қилдим. Аукциондаги ўн иккита боланинг бармоқ излари туширилган сурати мени жуда қаттиқ таъсирлантирди. Ҳозирда уларнинг биттаси ҳаёт экан. Тилагим, бу болажонлар тезроқ соғайиб, ота-онасини қувонтирсин", — дейди Ёшлар ишлари агентлиги Тошкент вилояти бошқармаси бошлиғи Миразиз Мирсултонов.
Ёшлар вакиллари суратларни кўнгилли равишда сотиб олиб, болаларнинг даволанишига ҳисса қўшишга ҳаракат қилмоқда.
