Бекхэмлар машҳурлиги сири нимада?

 

Дэвид ва Виктория Бекхэмлар жуфтлиги ўз номини бренд даражасига олиб чиқа олган юлдузлар сифатида тилга олинади. Жуфтлик ҳақида ҳатто Netflix сериал ишлади.

 

Улар шоу-бизнеснинг элита қатламига мансубдир. Англия терма жамоасининг собиқ капитани ҳамда Spice Girls гуруҳи собиқ аъзосининг машҳурлик сири нимада?

 

90 йиллар охирида пайдо бўлган Бекхэмлар бренди тез орада жаҳон миқёсига чиқди. Виктория ва Дэвид ўз шуҳратини бирлаштириб, уни анчагина катта капиталга айлантириб олди.

 

Sunday Times ҳисоб-китобига кўра, айни пайтда уларнинг бойлиги 500 млн еврога етади.

 

Қандай қилиб улар бунга эришди, деган саволга эса таҳлилчилар қуйидагича жавоб беради: уларнинг ҳар бири аввалданоқ алоҳида машҳур эди.

 

Турмушга чиқишдан аввал Виктория Адамс машҳур мусиқий гуруҳ яккахони эди. Дэвид Бекхэм эса "Манчестер Юнайтед"нинг порлаётган юлдузи. Аммо тўйгача уларнинг шуҳрати бу даражада эмас эди. Дэвид ривожланаётган пайтда футболчилар энди юлдузга айланаётган эди. У пайтда футболчилар юз кремлари, кроссовкалар ёки мобил телефонлар рекламасида энди пайдо бўлишни бошлаган эди. Бекхэм ҳам шу йўлни танлади. Одамлар уни журналлар, телевидение ва Интернетда кўра бошлади.

 

Виктория эса поп саҳнада порлаётган эди.

 

Spice Girls гуруҳи парчалангандан сўнг ҳам у машҳурлигини йўқотмади, аксинча, футбол юлдузининг рафиқаси сифатида тез-тез камера қаршисида пайдо бўлди. Бундан у унумли фойдаланиб ўз кийим брендига асос солди.

 

Жуфтлик ўз тўйидан ҳам фойда олган. Келин-куёв эксклюзив расмлар учун Британия журналларидан 1 млн фунт стерлинг олган.

 

Дэвид эса бир муддат машҳур брендларга ҳомийлик қилгач, ўз парфюмерия брендига асос солди. Ҳозир у атир, аксессуарлар сотиш ва бир неча инвестиция компанияларини бошқариш билан шуғулланади.

 

Бир неча миллионлик шартномалардан тушган даромадни собиқ футболчи Америка футбол лигаси акцияларига эгалик қилишга сарфлаган.

 

Жуфтлик эгалик қиладиган Beckham Brand Holdings Limited компанияси 2021 йилда 22 млн евродан кўп даромад олган.

 

Виктория 2006 йилда жинси кийимларнинг биринчи коллекцияларини dVb (David and Victoria Beckham) маркаси билан ишлаб чиқарди. Аммо тез орада, 2008 йилда Нью-Йоркдаги мода ҳафталигида Victoria Beckham бренди остида қатнашди.

 

Интернет ва ижтимоий тармоқлар ривожланиши билан Бекхэмлар ҳам бизнесларини кенгайтириб борди.

 

Улар ҳатто кичик фарзандининг касаллигидан ҳам фойдалана олган. 90 йиллар охирида у ўғли касаллиги туфайли қатор машғулотларни ўтказиб юборди ва бу ҳақда ўз интервьюларида тўлқинланиб гапирди.

 

Ўтган йили уларнинг тўнғич ўғли Бруклин америкалик машҳур саноатчи ва миллиардернинг қизи Николь Пельтцга уйланди. Ота-онасининг тўйида бўлгани каби бу сафар ҳам матбуот эксклюзив расмлар учун курашди. Миш-мишларга кўра, бунинг учун 3,5 млн евро тўланган. Ўз номидан пул қилиш санъати ота-онадан фарзандларга ҳам ўтган кўринади.