ҲАМАС Москвада. Кутилмаган ташрифдан мақсад нима?
Исроил бу ташрифдан Россияга кескин норозилик билдирди
ҲАМАС делегацияси Москвага ташриф буюрди. РИА Новости маълумотларига кўра, делегацияга ҲАМАС сиёсий бюроси аъзоси Абу Марзук бошчилик қилмоқда. Россия Ташқи ишлар вазирлиги ҲАМАС вакилларининг Москвага ташрифини тасдиқлади. Ташриф мақсадлари аниқлаштирилмаган.
Россия анъанавий равишда ҲАМАС билан алоқаларни давом эттирмоқда. Дунёнинг бошқа кўплаб давлатларидан фарқли ўлароқ, бу гуруҳ Россия Федерациясида террорчи ҳисобланмайди. ҲАМАС делегациялари мунтазам равишда Москвага ташриф буюришади. Бу сафар Ғазо секторида жангариларнинг Исроилга ҳужуми ва асирларни гаровга олиши оқибатида юзага келган янги уруш бошланганидан бери биринчи ташриф бўлди.
Россия Ташқи ишлар вазирлиги ҲАМАС делегацияси билан музокаралар мавзуларидан бири ҳақида гапирди:
"ҲАМАС исломий қаршилик ҳаракати Сиёсий бюроси аъзоси Абу Марзук Москвада. У билан Ғазо секторида жойлашган хорижлик гаровга олинганларни зудлик билан озод қилиш бўйича Россия линиясининг давоми бўйича алоқалар бўлиб ўтди ҳамда Россия ва бошқа хорижий фуқароларни Фаластин анклавидан эвакуация қилишни таъминлаш масалалари муҳокама қилинди", — дейилади Россия Ташқи ишлар вазирлиги баёнотида.
Исроил томони эса ҲАМАС вакилларини Москвага боргани муносабати билан Россияга кескин норозилик билдирди.
"Исроил ХAМAСнинг юқори мартабали мулозимларини Москвага таклиф қилишни терроризмни қўллаб-қувватловчи ва ҲAМAС террорчиларининг ваҳшийликларини қонунийлаштирадиган номақбул қадам деб ҳисоблайди", — дейди Исроил Ташқи ишлар вазирлиги матбуот котиби Лиор Ҳаят.
