Кончилик — энг хавфли касблардан бири
Дунё бўйлаб ҳар йили конларда йирик фалокатлар содир бўлади.
Бугун, 28 октябрь куни Қозоғистоннинг Қарағанда вилоятидаги Костенко конида авария юз berdi. Тахминларга кўра, конда газ-метан портлаши содир бўлган. 252 кончидан 208 нафари ер юзасига олиб чиқилди, улардан 18 нафари тиббий ёрдамга муҳтож.
Шахтада 21 нафар кончи қолган. 32 нафар кончининг жасади топилган. Коннинг эгаси ArcelorMittal Temirtau (АМТ) компанияси бўлиб, унга тегишли шахтада 2023 йил август ойида ҳам авария юз берганди.
Аслида кончилик жаҳондаги энг хавфли касблар рўйхатида етакчи ҳисобланади. Дунё бўйлаб конларда бундай йирик фалокатлар ҳар йили содир бўлади. Уларнинг айримлари билан танишинг.
24 сентябрь куни Хитойнинг жануби-ғарбидаги Гуйчжоун провинциясидаги кўмир конида ёнғин содир бўлди. Ёнғин оқибатида камида 16 киши ҳалок бўлган.
14 март куни Колумбиянинг Сутатауса муниципалитетида портлаш содир бўлиб, камида бешта кўмир шахтасига таъсир кўрсатди. Портлаш вақтида туннелларда 30 дан ортиқ кончи бўлган. 11 киши ҳалок бўлди.
2022 йил 9 декабрь куни Индонезиянинг Ғарбий Суматра провинциясидаги кўмир конида портлаш содир бўлиб, 10 киши ҳалок бўлди, 15 киши жароҳатланди.
2020 йилнинг 14 октябрь куни Туркия шимолидаги кўмир конида портлаш содир бўлди. 300 метр чуқурликда 115 ишчи бўлган, уларнинг бир қисми эвакуация қилинган. 41 киши ҳалок бўлди.
20 апрель куни эса Полшададаги Пнивек конида метан портлаши содир бўлди, оқибатда тўққиз киши ҳалок бўлди ва етти киши бедарак йўқолди. Кейинчалик полшалик қутқарувчилар бешта кончининг жасадини топишга муваффақ бўлишди.
2021 йил 25 ноябрь куни Кемерово вилоятининг Белово шаҳридаги Листвяжная конида метан портлаши содир бўлди. Портлаш пайтида 285 киши ер остида эди, уларнинг аксарияти ташқарига чиқарилди. Ҳодиса оқибатида 51 киши ҳалок бўлган. Ростехнадзор маълумотларига кўра, авариянинг асосий техник сабаблари ҳаво етишмаслиги сабабли лаванинг газланиши, портловчи муҳитда электр жиҳозларининг ишлаши, газни таҳлил қилиш тизимининг ишлашига аппарат ва дастурий таъминотнинг аралашуви бўлган.
2020 йил 22 октябрь куни Индонезиянинг Суматра оролидаги кўмир конида кўчки содир бўлди. Ҳодиса кончилар лицензиясиз шахтадаги маълум бир кон майдонига боришга уринаётган пайтда юз берган. 11 кончи ҳалок бўлди.
27 сентябрь куни Хитойнинг жануби-ғарбий қисмидаги кўмир конида углерод оксиди чиқиши содир бўлди. Ҳодиса эрта тонгда шахтада 17 киши бўлган вақтда содир бўлган. Қутқарувчилар қамалиб қолган барча кончиларни чиқариб олишди, бироқ фақат бир киши қутқарилди, қолган 16 киши ҳалок бўлди.
2019 йил 17 декабрга ўтар кечаси Хитойнинг Гуйчжоу провинциясидаги кўмир конида газ чиқиши содир бўлди. Ҳодиса вақтида шахтада 23 киши бўлган, етти киши чиқиб кетишга муваффақ бўлган. 14 кончи ҳалок бўлди.
2018 йил 20 декабрь куни Чехиянинг Карвина шаҳри яқинидаги кўмир конида метан портлаши содир бўлди. Ҳудудда жами 23 нафар кончи ишлаган, улардан икки нафари Чехия, қолганлари Полша фуқаролари бўлган. Фавқулодда ҳодисада 13 нафар кончи ҳалок бўлди, яна 10 киши жароҳат олди.
12 август куни Покистоннинг Балужистон вилоятидаги кўмир конида портлаш содир бўлиб, қулаб тушди. 12 ишчи ҳалок бўлди. Қутқарув операцияси давомида кислород етишмаслиги сабабли ҳушсиз ҳолатда топилган 16 кишини қутқарилган. Яна беш нафар кончининг тақдири номаълум.
2017 йил 7 май куни Хунан провинциясидаги кўмир конида газ чиқиши оқибатида 18 киши ҳалок бўлди. Фавқулодда вазият вақтида конда 55 нафар кончи бўлган. Қутқарувчилар 37 кишини ташқарига олиб чиқишга муваффақ бўлди.
2016 йил 29 декабрь куни Ҳиндистоннинг Жхарханд штатидаги кўмир конида шахта қулаши содир бўлди. 16 кончи ҳалок бўлди.
3 декабрь куни Хитой шимолидаги Ички Мўғулистон автоном вилоятидаги кўмир конларидан бирида портлаш содир бўлди. 17 кончи ҳалок бўлди.
2015 йил 17 декабрь куни Хитойнинг Хулудао шаҳридаги тоғ-кон компаниясининг шахталаридан бирида пайвандлаш ишлари натижасида ёнғин содир бўлди. 13 киши ҳалок бўлди, яна 10 киши яраланди.
