Яна инсонпарварлик ёрдами ортилган 39 та юк машинаси Ғазога кирди
21 октябрдан буён Рафаҳ чегара пунктидан Ғазо секторига 171 юк машинаси ўтган.
Исроил ҳарбийлари душанба куни гуманитар ёрдам олиб кетаётган яна 39 юк машинаси Ғазога кирганини маълум қилди. Шу тариқа, 21 октябрдан бери Рафаҳ чегара пунктидан 171 юк машинаси ўтган.
АҚШ маъмурияти қошидаги Миллий хавфсизлик кенгаши спикери Жон Кирбининг сўзларига кўра, АҚШ яқин кунларда Ғазога етказиладиган инсонпарварлик ёрдами ҳажми кунига 100 та юк машинасига етказилишига умид қилмоқда. Шу билан бирга, хайрия ташкилотлари вакилларининг таъкидлашича, кунига 100 та юк машинаси Ғазо сектори тинч аҳоли эҳтиёжлари учун минимал миқдордир.
