Ўзбекистондаги "яшаш учун энг қулай шаҳарлар" аниқланди
Рейтинг аҳоли сони 40 минг кишидан ортиқ бўлган республиканинг 30 та шаҳри учун ишлаб чиқилган.
Макроиқтисодий ва ҳудудий тадқиқотлар институти томонидан Ўзбекистон шаҳарларининг “яшаш учун қулайлиги” рейтинги тузилди.
Индексни шакллантиришда таълим, соғлиқни сақлаш, инфратузилма, барқарорлик, маданият ва атроф-муҳит йўналишларидаги жами 27 та миқдорий ҳамда сифат кўрсаткичларидан фойдаланилган. Рейтинг аҳоли сони 40 минг кишидан ортиқ бўлган республиканинг 30 та шаҳри учун ишлаб чиқилган. Рейтинг 100 балли тизимда тузилган.
Таъкидланишича, шаҳарларда яшаш қулайлиги йиғма индекс асосида баҳоланиб, индекс миллий статистик кўрсаткичлар доирасида, Глобал Ливеабилитй рейтинги методологияси асосида ишлаб чиқилган.
Натижаларга кўра, республикадаги яшаш учун энг қулай шаҳарлар ичида Тошкент 79,1 балл билан биринчи ўринни эгаллаган. Урганч 76,0 балл билан иккинчи ўриндан жой олган бўлса, Бухоро 75,4 балл билан яшаш учун энг қулай 3-шаҳар бўлган. Рейтингнинг тўртинчи ва бешинчи поғонасидан Самарқанд (70,6) ва Навоий (68,1) шаҳарлари жой олган.
Рўйхатнинг энг қуйи бешталигида Бекобод (35,3), Хонобод (35,3), Янгиер (33,5), Оҳангарон (32,9) ҳамда Қувасой (26,4) шаҳарлари жойлашган.
Эътиборли жиҳати, рейтинг бўйича яшаш қулай ТОП-10 шаҳарларнинг барчаси вилоят марказлари ҳисобланиб, рейтингда ушбу шаҳарларга рейтинг поғоналари бўйича энг яқин Қўқон (13-ўрин), Хива (14-ўрин) ва Чирчиқ (16-ўрин) каби номарказий ҳудудий бирликлар жойлашди.
Йўналишлар кесимида етакчи шаҳарлар:
Таълим ҳамда тиббиёт: Бухоро, Гулистон ва Урганч.
Инфратузилма: Урганч, Навоий ва Тошкент.
Ижтимоий-иқтисодий барқарорлик: Тошкент, Урганч ва Гулистон.
Маданият ва атроф-муҳит: Тошкент, Бухоро ва Самарқанд.
Хулоса ўрнида айтиш мумкинки, рейтингни амалиётга жорий этиш натижасида республика шаҳарларининг умумий ҳолатини бир неча йўналишлар бўйича доимий мониторинг қилиб бориш имкони яратилади. Шунингдек, рейтингни такомиллаштириш доирасида ҳар бир йўналиш бўйича мавжуд муаммоли соҳалар аниқланиб, уларни бартараф этиш ҳамда келгусидаги иқтисодий ривожланишга тўсиқ бўлувчи омилларни камайтириш мумкин, - дейилади институт хабарида.
