Телеграмда яна вирус тарқалмоқда

 

Телеграмда "Илтимос, қизимга овоз беринг" мазмунида яна вирус тарқалмоқда. Ҳуқуқшунос Хушнудбек Худойбердиев бу бўйича ўз каналида пост жойлади.

 

Унинг ёзишича, ҳеч кимнинг қизига овоз бериш керак эмас. Шунақа хабарларни кўрсангиз, ҳаволага кириб ўтирманг. Ҳаттоки энг яқин инсонингиздан келган бўлса ҳам.

 

Афсуски, шу каби хабарлар каналларда ҳам чиқиб кетмоқда (канал эгасининг профили бузилгани учун) ва доимгидек гуруҳларга тарқатилмоқда. Илтимос, Телеграмдан келган дуч келган ҳаволага кираверманг, қайта-қайта текширинг.

 

Мабодо эҳтиётсизлик сабабли профилингиз бузилган тақдирда ҳам, зудликда профилни тиклаш, вирусдан тозалаш чоралани кўринг. Бунинг учун Телеграмда «‎Созламалар» => «Қурилмалар» => «‎Бошқа барча сеансларни тугатиш» буйруқларини босишингиз керак.

 

Шунингдек, албатта 2 босқичли хавфсизлик тизимини уланг. Бунинг учун «‎Созламалар» => «Махфийлик ва хавфсизлик» => «Икки босқичли текширув» буйруқлари орқали ўзингиз мустақил пароль қўясиз.

 

Бу нима беради? Масалан, сизнинг профилингизга кимдир кирмоқчи бўлса, телеграм орқали юборилган СМС-кодни киритишдан ташқари, сиз ўйлаб топган паролни ҳам ёзиши керак бўлади. Бу эса ўз-ўзидан хавфсизликни кучайтиради. Фақат паролни сиз ҳам эсдан чиқариб қўйсангиз, уни тиклаш учун электрон почта манзили киритиб қўйишни эсдан чиқарманг.

 

Имкони бўлса паролни унутмаслик учун бирор яқин инсонингизнинг (ўзингизникини эмас) паспорт церийаси ва рақамини киритиб қўйинг. Эсдан чиқиб кетса ҳам, топиш осон бўлади.