Вазир ўринбосари аҳоли мурожаатини ўрганишга чиқди
Озода Жўраева аҳолининг иссиқлик таъминоти билан боғлиқ мурожаатига асосан Чилонзор тумани 7-мавзеда бўлди.
Мазкур мавзедаги 50 та кўп қаватли уйларга ҳудудда ташкил этилган 1-сонли концентрацион иссиқлик-электр маркази орқали иссиқлик энергияси етказилиб берилади.
Тошкент шаҳрида кузатилган совуқ об-ҳаво шароитида газ босимининг пасайиши кўп қаватли уйларнинг иссиқлик таъминотига салбий таъсир ўтказган.
Вазир ўринбосари Озода Жўраева, “Иссиқлик электр станциялари” АЖ бошқаруви раиси Баҳодир Жўраев ҳамда ҳокимлик масъуллари ҳолатни жойига чиққан ҳолда ўргандилар. Иссиқлик-электр марказининг барча ускуналари соз ҳолатда.
Ҳозирда газ босими кўтарилди ва кўп квартирали уйларга иссиқлик энергияси белгиланган тартибда узатилмоқда.
Озода Жўраева мазкур ҳудуддаги кўп квартирали уйларга хизмат кўрсатувчи “Боғистон” БСК фаолиятини ҳам кўздан кечирди. Аҳолига хизмат кўрсатиш сифатини янада яхшилаш, бошқарув ташкилоти биносини зарур талаблар асосида сақлаш бўйича топшириқлар белгиланди.
