Саида Мирзиёева Тошкент архитектура-қурилиш университети фаолияти билан танишди
Саида Мирзиёева замонавий ва яшил шаҳарларни барпо этишда янги авлод архитекторлари, лойиҳачилари ва муҳандисларини тайёрлаш муҳимлигини таъкидлади.
Президент администрацияси раҳбари Саида Мирзиёева Тошкент архитектура-қурилиш университети фаолияти билан танишди.
Қайд этилишича, айни пайтда университетда 4 та таълим йўналиши бўйича қарийб 10 минг талаба таҳсил олмоқда.
Олий таълим муассасасида маъмурий бошқарув, ўқув ва илмий жараёнларга рақамли технологиялар фаол жорий этилмоқда. Шунингдек, дуал таълим ривожлантирилмоқда, илмий ишланмаларни тижорат лойиҳаларига айлантириш ва талабалар шаҳарчасини инновацион ечимлар майдонига айлантиришга эътибор қаратилмоқда.
«Юртимиз шаҳарлари замонавий ва яшил маконга ўз-ўзидан айланиб қолмайди. Бунинг учун кенг фикрлайдиган, ноанъанавий ғояларни илгари сурадиган, экологик барқарор архитектура ва муҳандислик ечимларини ишлаб чиқадиган ҳамда уларни амалиётга татбиқ эта оладиган янги авлод архитекторлари, лойиҳачилари ва муҳандисларини тарбиялаш жуда муҳим», деб ёзди Саида Мирзиёева.
