Қозоғистонда ҳарбийлар ўлими: 13 та жиноят иши қўзғатилди
14 нафар ҳарбий ҳалок бўлган Каспий денгизидаги машғулотларни режалаштиришда қоидабузарликларга йўл қўйилгани аниқланди.
Қозоғистон Мудофаа вазирлигидаги комплекс текширувнинг дастлабки босқичи якунлари бўйича 13 та жиноят иши қўзғатилди. Текширув Каспий денгизидаги ҳарбий машғулотлар вақтида 14 нафар ҳарбий хизматчи ҳалок бўлганидан кейин бошланган.
5 октябрь куни Қозоғистон Президенти Қасим-Жомарт Тоқаев Мудофаа вазирлигидаги ҳолатни комплекс текшириш бўйича комиссия аъзолари билан йиғилиш ўтказди. Унда текширувнинг дастлабки натижалари тақдим этилди.
Маълум қилинишича, текширув ҳарбий тадбирларни режалаштиришда жиддий хатоларга йўл қўйилгани ва аввалги раҳбарият томонидан етарли назорат ўрнатилмаганини кўрсатган. Каспий денгизидаги фожиа юзасидан ўтказилган текширувда машғулотларни тайёрлаш ва режалаштириш, хавфларни баҳолаш, десант туширишни ташкил этиш ҳамда ҳарбий хизматчилар хавфсизлигини таъминлашда жиддий камчиликлар аниқланган. Текширувнинг биринчи босқичи якунларига кўра, Мудофаа вазирлигининг ташкилот ва бўлинмаларида давлат мулкини эҳтимолий талон-торож қилиш, мансаб ваколатларини суиистеъмол қилиш ва бошқа қонунбузарликлар юзасидан 13 та жиноят иши қўзғатилган.
Шунингдек, қўмондонлик таркибининг эҳтимолий жиноий совуққонлиги ҳолатлари бўйича судгача тергов давом этмоқда. Ушбу иш доирасида 5 нафар мансабдор шахс ҳибсга олинган. Тоқаев ҳарбий хизматчиларнинг ўлимига сабаб бўлган ҳолатлар учун айбдор мансабдор шахслар қонун доирасида жавобгарликка тортилиши кераклигини таъкидлаб, масалани шахсий назоратига олган.
Бундан ташқари, Қозоғистон Олий аудиторлик палатаси Мудофаа вазирлигига қарашли 50 та объект, жумладан, 48 та ҳарбий қисмда текширув олиб бормоқда. Аудит доирасида Қуролли кучлар фаолиятининг асосий йўналишларидаги ҳолат баҳоланади.
Фожиа 24-сентабр куни Манғистау вилоятида Қозоғистон Ҳарбий-денгиз кучларининг ўқув машғулотлари вақтида юз берган. Ноқулай об-ҳаво ва кучли шамол 17 нафар ҳарбий хизматчининг Каспий денгизига оқиб кетишига сабаб бўлган. Улардан уч нафари қутқарилган, 14 нафари ҳалок бўлган.
Комиссия текшируви давом этмоқда. Аниқланган камчиликларни бартараф этиш бўйича янги таклифлар ишлаб чиқилиши ва текширув натижалари Қуролли кучларни ислоҳ қилиш режасида инобатга олиниши белгиланган.
