Дунёда коронавируснинг янги варианти тарқалмоқда
Бу ҳақда Соғлиқни сақлаш вазирлиги хабар берди.
Бир қатор давлатларда коронавируснинг янги ФЛиРТ вариантлари, жумладан, вируснинг KP.2, KP.1.1, КС.1 турлари билан касалланиш ҳолатлари аниқланмоқда. Уларнинг барчаси аввалги турларга қараганда хавфсизроқ экани айтилмоқда, дейилади Соғлиқни сақлаш вазирлиги хабарида.
Янги тур генетик коддаги мутациялар номлари шарафига ФЛиРТ деб аталган. ФЛиРТ Омикрон оиласига тегишли бўлиб, дастлабки маълумотларга кўра, бутун дунёда доминантга айланиши мумкин. ФЛиРТ вариантларининг белгилари омикронникига ўхшайди: иситма, йўтал, томоқ, бош ва мушак оғриқлари, ҳолсизлик, таъм ёки ҳид билмаслик.
ФЛиРТ вариантининг тарқалиши туфайли АҚШ Касалликларни назорат қилиш ва олдини олиш маркази (СДС) бу йилги ёзда Америкада коронавирус ҳолатлари кўпайишини тахмин қилмоқда. СДС маълумотларига кўра, март ойининг бошидан бери ФЛиРТнинг Қўшма Штатлардаги жами коронавирус ҳолатларидаги улуши 11 май ҳолатига кўра 3,8 фоиздан 28,2 фоизгача кўтарилган.
Буюк Британияда бу вариантлар 15 май ҳолатига кўра, барча ҳолатларнинг 21 фоизини ташкил қилган. Жаҳон соғлиқни сақлаш ташкилоти маълумотларига қараганда, ФЛиРТ 14 та Европа давлатида ва Исроилда аниқланган.
