“Халқ пули давлат бюджетига ўтдими, у давлатники”

Ижтимоий тармоқларда Қашқадарё вилояти адлия бошқармаси бошлиғининг матбуот анжуманида билдирган фикрлари тарқалиб, кенг муҳокамаларга сабаб бўлмоқда.

 

Унда Салоҳиддин Нуриев “Халқ пули давлат бюджетига ўтдими, у давлатнинг пулига айланади”, деган фикрни айтганди. Ҳолат юзасидан Адлия вазирлиги муносабат билдирди.

 

Қайд этилишича, ҳозирда мазкур ҳолат вазирлик томонидан ўрганилмоқда, ўрганиш якунлари бўйича ҳолатга баҳо берилади.

 

Таъкидланишича, давлат органлари ўз фаолиятида халқ олдида ҳисобдор эканлиги Конституцияда белгилаб қўйилган, Адлия вазирлиги фаолияти, шу жумладан, жамоатчилик олдида қатъий ҳисобдорлик принципи асосида ташкил этилган.

 

Хусусан, Ўзбекистон Конституциясига кўра, халқ давлат ҳокимиятининг бирдан-бир манбаидир. Давлат халқ иродасини ифода этиб, унинг манфаатларига хизмат қилади. Давлат органлари ва мансабдор шахслар жамият ва фуқаролар олдида масъулдирлар.

 

Барча фуқаролар, фуқаролик жамияти институтлари белгиланган тартибда, шу жумладан, Ўзбекистон Республикаси Давлат бюджетининг шакллантирилиши ҳамда ижро этилиши устидан жамоатчилик назоратини амалга ошириши мумкин.

 

“Ўрганиш натижалари бўйича қўшимча маълумот берилади”, дейилади хабарда.