Ўзбекистонда аҳолининг ўсиши секинлашди
Бу ҳақида Статистика агентиги маълум қилди.
2024 йилнинг 1 июль ҳолатига Ўзбекистон аҳолиси 37 млн 134,2 минг кишини ташкил этиб, ўтган йилнинг мос даврига нисбатан 2,1 фоиз ёки 761,8 минг кишига кўпайган. Бу ҳақИда Статистика агентиги маълум қилди.
Жорий йилдан бошлаб аҳоли сонининг ўсиши секинлаша бошлаган. Хусусан, 2023 йилнинг мос даврида аҳолининг ўсиши 2,2 фоизни ёки 768,8 минг нафарни ташкил этган.
2024 йил январь-июнь ойларида Ўзбекистонда қайд этилган никоҳлар сони 97 минг 400 тани ташкил этиб, ўтган йилнинг мос даврига нисбатан 1265 тага камайган. 2022 йилнинг мос даври билан таққосланганда эса 11 минг 534 тага камайган.
Ҳисобот даврида қайд этилган никоҳларда аёлларнинг ўртача ёши 22,9 ёшни, эркакларнинг ўртача ёши эса 27,8 ёшни ташкил этган. Қайд этилган никоҳларнинг энг катта улуши 25 ёшгача бўлган аёлларга тўғри келиб, жами никоҳларнинг 76,2 фоизини ташкил этган.
Жорий йилнинг биринчи ярим йиллигида қайд этилган никоҳдан ажралишлар сони 22 минг 467 тани ташкил этиб, 2023 йилнинг мос даврига нисбатан 2955 тага ёки 11,6 фоизга камайган. Шундай бўлсада, бу кўрсаткич 2021 йилга нисбатан 3 мингтага кўп.
