Фарғонада аҳолининг 4 млрд сўмдан ортиқ қарзи бекор қилинди
Уларга етарли даражада иссиқлик етказиб берилмаган вақт учун ҳам тўлов талаб қилинган.
Рақобат қўмитаси Фарғона вилоятида аҳолига ёзилган 4 млрд сўмдан ошиқ қарзни бекор қилди.
Қўмитанинг Фарғона вилояти ҳудудий бошқармасига тушган мурожаатлар асосида Фарғона вилояти “Иссиқлик манбаи” ишлаб чиқариш давлат бошқармаси билан ҳамкорликда маиший истеъмолчиларга етказиб берилган иссиқлик энергияси ҳамда кўрсатилган хизматлар бўйича ўрганиш ишлари олиб борилган.
Ўрганишларда иситиш мавсуми давомида кўп қаватли уйларга иссиқлик таъминотини етказиб берувчи марказий тармоқларнинг иситиш қозонхоналарида авария ҳолатлари (таъминот узилиши) содир бўлган вақтларда ҳамда табиий газ босими пастлиги ва бошқа асосли сабабларга кўра, аҳоли хонадонларига етарли даражада иссиқлик таъминоти етказиб берилмаганлиги, шунингдек, таъминотчи корхона билан тузилган шартномаларнинг тегишли бандларига асосан қайта ҳисоб-китоблар амалга оширилганда 6146 нафар истеъмолчининг хонадонларига 4 млрд 173 млн сўмдан ортиқ нореал дебитор қарздорликлар ҳисобланганлиги аниқланган.
“Истеъмолчилар ҳуқуқларини ҳимоя қилиш тўғрисида”ги Қонунга кўра, сотувчи (ижрочи) истеъмолчини ҳақ эвазига қўшимча товарлар сотиб олишга ёки қўшимча хизматлардан фойдаланишга қисташга, шунингдек кўрсатилмаган хизматлар учун ҳақ олишга ҳақли эмас.
Юқоридагиларга кўра, ишни кўриб чиқиш якуни бўйича ҳудудий бошқарма томонидан мазкур ҳолат юзасидан вилоят “Иcсиқлик манбаи” ишлаб чиқариш давлат бошқармасига истеъмолчиларга ҳисобланган 4 млрд 173 млн сўмдан ортиқ асоссиз қарздорликни бекор қилиш юзасидан кўрсатма берилган.
