Ўзбекистонда СОВИД-19 нинг янги штамми аниқлангани ростми?
Соғлиқни сақлаш вазирлиги ҳолат бўйича маълумот берди.
Ижтимоий тармоқларда дунёнинг қатор мамлакатлари бўйлаб СОВИД-19 нинг XYeC номли янги штамми тарқалаётгани ҳақида хабарлар тарқалмоқда. Соғлиқни сақлаш вазирлиги Матбуот хизмати расмий муносабат билдирди.
Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Атабековнинг маълум қилишича, бугунги кунда дунё бўйлаб "омикрон" штаммининг 10 та версияси "айланиб юрибди".
Таъкидланишича, бу касаллик енгил ва асоратсиз, аниқроғи ЎРВИ ва гриппга хос белгилар билан кечмоқда. Фақат айрим фарқли аломатлари бор. Енгил нафас қисиши, давомли йўтал, таъм ва ҳид билиш қобилияти қисман йўқолиши, ҳолсизлик каби симптомлар шулар жумласидан.
Қолаверса, халқаро тиббий амалиётда XYeC штаммини юқтирган беморлар асосан бир-икки ҳафтада тўлиқ тузалиб кетиши кузатилмоқда.
"Ҳозир Ўзбекистонда XYeC штамми қайд этилгани йўқ. Ўз навбатида, СОВИД-19 га қарши етарли вакциналар захирасига эгамиз. Шу боис юртимизда катта миқёсдаги эпидемия ва пандемиялар кузатилиши эҳтимолдан йироқ. Негаки, аҳолимизда мавжуд бўлган жамоавий иммунитет мазкур касаллик қўзғатувчисини мамлакат ҳудудига кириб келиб, жуда кенг кўламда тарқалиш хавфини сезиларли даражада камайтиради"- деди Нурмат Атабеков .
