Термизда янги “дом”нинг девори шамолда кўчиб тушди
Ҳозирда буюртмачи-пудратчи томонидан муаммо бартараф этилмоқда.
Ижтимоий тармоқларда Сурхондарё вилоятининг Термиз шаҳридаги янги қурилган домнинг девори шамолдан кўчиб тушгани акс этган видео тарқалди. Ҳозирда вилоят Қурилиш ва уй-жой коммунал хўжалиги соҳасида ҳудудий назорат қилиш инспекцияси томонидан мазкур ҳолат назоратга олинган.
Қайд этилишича, Термиз шаҳри “Гулистон” МФЙ ҳудудидаги 5 қаватли 20 хонадонли турар жойнинг ташқи девор ён томонидан 35-40 м2 қисми кучли шамол таъсирида кўчиб тушган.
Ҳозирда буюртмачи-пудратчи ташкилот “Термиз қурилиш индустрия саноат” ИК томонидан муаммони бартараф этиш мақсадида барча керакли қурилиш материаллари олиб келинган ва тегишли ишлар олиб борилмоқда.
