20 дан ортиқ IT соҳасидаги хотин-қизлар тақдирланди

Рақамли технологиялар вазирлигида It соҳасидаги хотин-қизларнинг ютуқларига бағишланган биринчи “Yulduz tech Awards” тақдирлаш маросими бўлиб ўтди.

 

Тадбирнинг асосий мақсадлари: Хотин-қизларнинг IT ривожига қўшган ҳиссасини эътироф этиш; Уларни қўллаб-қувватлаш ва мотивация бериш; Профессионал алоқаларни мустаҳкамлаш.

 

Тадбир давомида 20 дан ортиқ хотин-қизлар IT соҳасидаги муваффақиятлари учун мукофотланди. Уларга ҳомийлар томонидан эсдалик совғалари, статуэткалар ва 6 ойлик Соурсера платформасида бепул таълим олиш имконини берувчи ваучерлар топширилди.

 

“Биз IT соҳасида хотин-қизлар иштирокини кенгайтириш тарафдоримиз. Ўзбекистон иқтидорли ёшларга бой ва технологияга интилувчан, ижодкор қизларимиз ҳар доим олдинги сафда. Хотин-қизларнинг технология соҳасидаги имкониятларини ошириш бу миллий ғурур ва келажакка сармоя. Биргаликда ҳар бир қизнинг рақамли дунёда ўз ҳиссасини қўшиши учун инклюзив ва инновацион жамият яратамиз”, деди Рақамли технологиялар вазири биринчи ўринбосари Олег Пекос.