100 нафар фаластинлик Ўзбекистонга эвакуация қилинди
Эвакуация қилинган фаластинликлар юртларига қайтгунларича Ўзбекистонда қолади.
100 нафар фаластинлик ярадор аёллар ва болалар уларнинг ҳамроҳлари билан бирга Ўзбекистонга эвакуация қилинди. Бу ҳақида Ўзбекистоннинг Қоҳирадаги элчиси Мансурбек Қиличев хабар бермоқда.
Маълум қилинишича, ушбу эвакуация икки давлатнинг Соғлиқни сақлаш вазирликлари ҳамкорлигида президент Шавкат Мирзиёев ташаббуси билан амалга оширилди. Шавкат Мирзиёев 11 ноябрь куни навбатдан ташқари араб-ислом саммитида сўзлаган нутқида урушда жабрланган фаластинлик болалар ва аёлларни Ўзбекистон шифохоналарида беғараз даволашга тайёр эканини айтганди.
Эвакуация қилинган фаластинликлар юртларига қайтгунларича Ўзбекистонда қолади. Ушбу бемор фаластинликлар даволаниш ва соғлиқларини қайта тиклаш учун реабилитация марказлари ва шифохоналарга жойлаштирилади.
Ўзбекистон ҳукумати уларга мамлакатда бўлиш даврида оиласининг барча эҳтиёжлари, жумладан, меҳмонхоналар, мактаблар, озиқ-овқат ва бошқа нарсалар билан таъминлайди.
