Қондаги гемоглобин миқдорини ошириш бўйича тавсиялар

 

Гемоглобин – қон таркибидаги асосий оқсиллардан бири бўлиб, организмнинг кислород билан таъминланишида катта роль ўйнайди. Унинг етарлича бўлмаслиги заифлик, бош айланиши, соч тўкилиши каби муаммоларга олиб келиши мумкин. Гемоглобин даражаси пасайишининг энг кенг тарқалган сабаби темир танқислиги анемияси ҳисобланади. Айниқса, аёллар, ҳомиладорлар, қариялар ва доимий равишда қон топширадиган кишилар бу муаммони бошдан кечириши мумкин.

 

Шифокорлар гемоглобин миқдорини ошириш учун дори воситаларидан ташқари, темир ва витаминларга бой маҳсулотларни истеъмол қилишни тавсия этади. Қуйидаги 9 та маҳсулот эса қон таркибини яхшилашга ёрдам беради.

 

1. Қизил гўшт ва жигар

Мол ёки қўй гўшти гемоглобин кўтариш учун энг яхши табиий манбалардан бири ҳисобланади. Жигар эса темир ва фолий кислотаси билан бой бўлиб, қонни кислород билан тўлдиришга ёрдам беради.

 

2. Баргли сабзавотлар

Исмалоқ, брокколи, шолғом барглари ва кале кабилар организм учун фойдали темир манбаларидир. Уларни С витаминига бой маҳсулотлар билан истеъмол қилиш тавсия этилади, чунки бу темирнинг сўрилишини яхшилайди.

 

3. Дуккаклилар

Нўхат, ловия, ясмиқ каби маҳсулотлар нафақат темир, балки оқсил ва клетчаткага ҳам бой. Улар камқонликнинг олдини олиш ва қизил қон ҳужайраларини кўпайтиришга ёрдам беради.

 

4. Анор

Анор ва анор шарбати гемоглобин миқдорини оширишда самарали ҳисобланади. Бу мева таркибида темир, витаминлар ва антиоксидантлар мавжуд.

 

5. Лавлаги

Лавлаги қон ишлаб чиқариш жараёнини фаоллаштиради ва организмдаги темир етишмовчилигини бартараф этишга ёрдам беради. Лавлаги шарбатини ичиш ёки уни салатларга қўшиш мумкин.

 

6. Хурмо ва бошқа қуритилган мевалар

Хурмо, майиз, ўрик қоқиси гемоглобин даражасини оширишга ёрдам беради. Бироқ, юқори шакар миқдори сабабли диабетга мойил кишилар буларни меъёрида истеъмол қилишлари лозим.

 

7. Қовоқ уруғлари

Темир, магний ва рухга бой бўлиб, қон айланишини яхшилайди. Салатларга қўшиш ёки газак сифатида истеъмол қилиш мумкин.

 

8. Тарвуз

Тарвуз таркибидаги темир ва С витамини организмга темирни тезроқ сўришга ёрдам беради. Ёз фаслида фойдали ва табиий восита ҳисобланади.

 

9. С витаминига бой маҳсулотлар

Апельсин, лимон, грейпфрут, булғор қалампири, помидор ва резавор мевалар темирнинг яхши сўрилишига ёрдам беради. Кунлик рационда ушбу маҳсулотларни кўпайтириш тавсия этилади.

 

Гемоглобин пасайишига фақат темир танқислиги сабаб бўлмайди. Шунинг учун шифокор билан маслаҳатлашиш ва қўшимча текширувлардан ўтиш муҳим.

 

Рационни темир ва витаминларга бой маҳсулотлар билан бойитиш гемоглобин миқдорини табиий равишда оширишга ёрдам беради.

 

Камқонлик даражаси жиддий бўлса, фақатгина овқатланиш билан уни бартараф этиш қийин бўлиши мумкин, шунинг учун керак бўлса шифокор томонидан белгиланган дорилар қабул қилиниши лозим.