Олимлар кўз ва тери саломатлигини сақловчи мевани аниқлашди

 

Ўрик таркибида кўплаб антиоксидантлар мавжуд бўлиб, улар кўз ва тери ҳужайраларини шикастланиш ҳамда эрта қаришдан ҳимоя қилади. Бу мева хун толаларига бой бўлгани учун ичак фаолиятини ҳам яхшилайди.

 

Шифокорларнинг таъкидлашича, ўрик организм учун муҳим бўлган бета-каротин манбаи ҳисобланади. Бета-каротин организмда А витаминига айланиб, терининг эластиклигини сақлашга ва ажинлар пайдо бўлишининг олдини олишга ёрдам беради. Айнан шу модда ўрикларга ёрқин тўқ сариқ ранг беради.

 

Ўрикдаги А витамини коллаген ишлаб чиқаришни рағбатлантириб, терини ёш ва силлиқ ҳолатда сақлашга ёрдам беради. Шунингдек, ўрикнинг 85 фоиз сувдан иборат бўлгани сабабли, у терини нам ва эластик сақлайди.

 

Доктор Червонининг таъкидлашича, ўрик пўстлоғида фойдали ўсимлик толалари мавжуд бўлиб, улар ичаклардаги фойдали бактерияларни озиқлантиради, вазнни бошқаришга ёрдам беради ва узоқ вақт тўқлик ҳиссини сақлайди. Хун толаларини кўпроқ қабул қилиш учун ўрикни қуритилган ҳолда истеъмол қилиш мумкин, чунки қуритилган ўрик янги мевага қараганда тахминан уч баравар кўпроқ толага эга. Бироқ, ундаги шакар миқдори юқорироқ бўлишини ҳам инобатга олиш керак.

 

Парҳезшуносларнинг қўшимча қилишича, ўрик таркибидаги антиоксидантлар эркин радикалларни зарарсизлантириб, ҳужайраларга зарар етказадиган ва сурункали касалликларнинг ривожланишига сабаб бўлувчи оксидловчи стрессни камайтиради. Шунингдек, ўрик ичаклардаги яллиғланиш жараёнларини камайтиришга ҳам ёрдам беради.