Ишхонасида гиёҳванд модда чекишда гумон қилинган амалдор ишдан бўшатилди
0,69 грамм гашиш моддаси мусодара қилинган.
Андижон вилояти Камбағалликни қисқартириш ва бандликка кўмаклашиш бошқармаси раҳбари ва унинг ўринбосари ишдан олинди. Бунга бошқарма раҳбар ўринбосари хизмат хонасида гиёҳванд модда — гашиш чекаётгани акс этган суратнинг ижтимоий тармоқларда тарқалиши сабаб бўлди.
Ички ишлар вазирлиги маълумотига кўра, 0,69 грамм гашиш моддаси мусодара қилинган. Суд-кимёвий экспертиза хулосасига кўра, ушбу модда гиёҳвандлик воситаси экани тасдиқланган.
Андижон вилояти Бандлик бошқармасига кўра, Андижон шаҳар бўлими бошлиғи D.U. ва унинг ўринбосари S.B. билан меҳнат шартномалари расман бекор қилинган. Ҳозирда ҳолат юзасидан тергов ишлари олиб борилмоқда.
