Ҳид орқали онг фаолиятини ошириш мумкин

 

Хушбўй ҳидлар нафақат муҳитни ёқимли қилади, балки инсон миясининг фаолиятига бевосита таъсир кўрсатиши мумкин. Калифорния университети (Лос-Анжелес) олимлари олиб борган тадқиқот бунга далил бўлди.

 

Тадқиқотда 60 ёшдан 85 ёшгача бўлган кўнгиллилар иштирок этган. Улар икки гуруҳга бўлинган: биринчи гуруҳ одатий муҳитда ухлашда давом этган бўлса, иккинчи гуруҳ ётоқхонасида ҳар кеча турли ҳидлар (атиргул, эвкалипт, апельсин, ялпиз, бибария, лимон ва лаванда) пуркалган.

 

Олти ой давом этган кузатувлар натижасида мутахассислар ақл бовар қилмайдиган фарқни қайд этдилар: ҳид билан бойитилган муҳитда ухлаган иштирокчиларда когнитив қобилиятлар — яъни хотира, эътибор ва ўрганиш қобилияти — 226 фоизга ошган.

 

Олимлар бу ҳодисани шундай тушунтирадилар: ҳидлар миянинг ҳиссиётлар ва хотиралар учун жавобгар бўлган лимбик тизими ва гиппокампига кучли стимуляция беради. Натижада бу ҳудудлар фаоллашади ва янги ахборотни қабул қилиш, сақлаб қолиш жараёни анча кучаяди.

 

Мазкур тадқиқот кекса ёшдаги инсонлар учун хотирани тиклаш, мия фаолиятини фаоллаштириш ва ҳатто Альтсгеймер сингари касалликларнинг олдини олишда янги ёндашувларга йўл очиши мумкин.