COVID-19 билан касалланганлар бошқаларга нисбатан кўпроқ касал бўлади
Ўтказилган тадқиқотда 800 мингдан ортиқ одам иштирок этган.
Америкалик олимлар ўтказган янги тадқиқот шуни кўрсатдики, COVID-19 билан касалланган одамлар кейинчалик бошқа инфекцияларга 20–50% кўпроқ чалинади. Улар шамоллашни оғирроқ ўтказади, йўтал кучлироқ бўлади ва узоқ давом этади. Ҳатто енгил ўтган коронавирус ҳолатлари ҳам соғлиққа узоқ муддатли таъсир кўрсатади.
Сент-Луис университети (АҚШ) олимлари томонидан олиб борилган тадқиқот натижалари T-Online портали орқали эълон қилинди. Тадқиқотда 800 мингдан ортиқ одам иштирок этган бўлиб, уларнинг 200 минг нафари COVID-19 билан касалланган. Таҳлилларга кўра, коронавирусдан кейинги бир йил ичида бу одамлар вирусли, бактериал ва замбуруғли касалликлар, ҳамда нафас йўллари касалликлари ва ўпка зарарланишлари билан кўпроқ касалланган.
Мутахассислар бу ҳолатнинг аниқ сабабини ҳали айта олишмаган. Иккала гуруҳ ҳам бир хил шароитда яшаган бўлсада, фақатгина изоляция ёки карантин билан боғлиқ тушунтиришлар етарли бўлмаслиги мумкин.
Олимлар COVID-19 иммун тизимига узоқ муддатли салбий таъсир кўрсатиши, шунингдек, шиллиқ қаватларни зарарлаб, организмни бошқа инфекциялар учун очиқроқ қилиб қўйиши мумкинлигини тахмин қилмоқда. Улар бу механизмларни чуқурроқ ўрганиш зарурлигини таъкидламоқда.
