“Қадимги цивилизацияларга саёҳат”

Ўзбекистондаги Ислом цивилизацияси марказида илмий изланишлар ва маданий-маърифий лойиҳалар асосида янги босқич бошланмоқда. “Қадимги цивилизацияларга саёҳат” номи остида ташкил этилаётган иммерсив шоу орқали қадим ўтмиш замонавий технологиялар ёрдамида томошабинларга янгича тарзда тақдим этилади. 

 

Лойиҳа доирасида Исломдан аввалги даврга оид беш муҳим цивилизация — Хоразм, Бақтрия, Суғд, Чоч ва Фарғона маданий мерослари чуқур илмий тадқиқ этилмоқда. 1-босқичда ушбу ҳудудларда мавжуд бўлган қадимий шаҳарлар, ёзувлар, архитектура, маданият ва ижтимоий ҳаётга оид тарихий манбалар ўрганилиб, уларнинг рақамли технологиялар орқали жонлантирилиши кўзда тутилган. 

 

Бу ҳақида “Исломдан аввалги давр цивилизациялари” бўлими координатори, тарих фанлари доктори, профессор Мирсодиқ Исхоқов қуйидагича фикр билдирди:

 

 –  Ушбу иммерсив шоу замонавий талқинда тарихни гавдалантириши билан эътиборга моликдир. Маҳаллий ва чет эллик сайёҳлар музейга ташриф буюрар экан, унинг айнан замонавий тарзда тарихни ёритилишидан завқ олишса ажаб эмас. иммерсив шоунинг асосий ғояси – қадимий тарихни рақамли маконда жонлантириш, уни нафақат кўриш, балки ҳис қилиш имконини беришдир. Ташриф буюрувчилар ўзини гўёки қадимги Бақтрия саройида ёки Суғд бозори ичида тургандек ҳис қилиши мумкин. VR (виртуал реаллик), 3D моделлаштириш, овоз эффектлари ва интерактив элементлар орқали яратиладиган саҳналар илмий асосланган ҳолда ишланмоқда. Бу нафақат тарихни ўрганиш, балки уни ҳис қилишдир. Ўзбекистон тарихининг турли босқичларини ҳар томонлама ёритишга қаратилган бу лойиҳа юртимиз туризм салоҳиятини оширишга хизмат қилади. Айниқса, хорижий сайёҳлар учун бу ёндашув ўзига хос янгилик бўлиб, тарихни замонавий эстетикада кўрсатиш орқали уларни чуқур таассуротга солади.