Тошкентда хизматдаги ЙПХ инспекторини машина уриб кетди
Воқеа юзасидан тергов ишлари бошланган.
23 апрель куни эрталаб соат 08:30 атрофида Тошкент шаҳрининг Дормон йўли ва Мирзо Улуғбек кўчаси кесишмасидаги чорраҳада хизмат олиб бораётган йўл-патруль хизмати инспекторини Траскер русумидаги автомобиль уриб юборди. Бу ҳақда тегишли идоралар хабар берди.
Воқеа тирбандликнинг олдини олиш учун инспектор чорраҳанинг марказида тартибни назорат қилаётган вақтда содир бўлган. Унинг айтишича, қайси қатордан келгани аниқ бўлмаган Траскер тўсатдан келиб урган.
Оғир тан жароҳатлари олган инспектор шифохонага етказилган. Унга чап сон суягининг бир неча жойдан синиши, чап тизза ва оёқ соҳасида лат ейиш, шунингдек, ўнг ва чап қўл тери шикастланиши ташхиси қўйилган.
Воқеа жойида бўлган бошқа ходимлар ва Миллий гвардия тезкор ёрдам кўрсатган. Ҳозирда ушбу ҳолат юзасидан терговга қадар текширув ишлари олиб борилмоқда.
