Мисрда кучли қум бўронлари бошланди
Кўчаларда ҳаёт деярли тўхтаб қолган.
Мисрда баҳор фаслининг машҳур Ҳамсин бўронлари кучайиб, айниқса Юқори Миср, Катта Қоҳира ва Сувайш канали атрофидаги ҳудудларни қоплаб олди. Кучли шамол ва қум ҳавони тўлдириб, кўриш масофасини деярли йўқ қилди.
Ҳукумат одамларни имкон қадар уйда қолишга чақирмоқда. Зарур ишлар билан чиқишга тўғри келса, ниқоб ёки рўмол билан юзни беркитиш тавсия қилинмоқда. Айни пайтда, кўчаларда ҳаёт деярли тўхтаб қолган, мактаблар ёпилган, аэропортларда парвозлар кечикмоқда.
Шифокорлар юрак-қон томир ва нафас йўллари касалликлари бор инсонларга алоҳида эҳтиёткорлик билан юришни маслаҳат беришмоқда.
