Microsoft 7000 га яқин ходимини ишдан бўшатади
Ўзгаришлар ички тузилмани янада соддалаштиришга қаратилган.
Microsoft бутун дунё бўйлаб 7000 га яқин ходимини ишдан бўшатишни режалаштирмоқда. Бу компания ишчи кучининг тахминан 3 фоизини ташкил этади. Қисқартиришлар барча бўлим ва лавозимларга тааллуқли бўлиб, бу ходимларнинг шахсий иш фаолиятига боғлиқ эмас.
Компания вакилларининг айтишича, бу ўзгаришлар динамик бозорда рақобатбардош бўлиб қолиш ва ички тузилмани янада соддалаштиришга қаратилган. Асосий мақсад — менежерлар сонини камайтириш ва тезкор, самарали жамоаларни шакллантириш.
Бу Microsoftнинг сўнгги йиллардаги энг йирик қисқартиришларидан биридир. 2023 йил бошида ҳам компания 10 мингга яқин иш ўрнини қисқартирган эди. 2025 йил апрель ойида Microsoft молиявий директори Эми Ҳуд компания кучли жамоалар тузишга ва бошқарув поғоналарини соддалаштиришга устувор аҳамият қаратаётганини таъкидлаган эди.
