Энди Ўзбекистоннинг ҳам ўз ҳарбий дрони бор

Тошкентда 29 майдан Мудофаа саноати ва хавфсизлик соҳасидаги инновацион технологиялар фестивали старт олди. Фестивалда Қуролли Кучларга зарур бўлган замонавий технологиялар, металлургия, кимё саноати ҳамда текстиль соҳасида ишлаб чиқарувчи ташкилот, йирик корхоналар ва жисмоний шахслар ҳамда ихтирочилар ўзларининг маҳсулотлари билан иштирок этишмоқда.

 

Инновацион ғояларни амалиётда синовдан ўтказиш, ёшлар ўртасида замонавий технологияларга қизиқишни янада кучайтириш ва муҳандислик соҳаларига кенг жалб қилиш, ишлаб чиқарувчи маҳаллий корхона ва ташкилотларни мудофаа саноати соҳасига йўналтириш мақсадида “Ғалаба боғи” ёдгорлик мажмуаси ҳудудида, мудофаа соҳасидаги инновацион технологиялар фестивали икки йилдан буён ташкил этилади.

 

 

 

 

Фестивалнинг бу йилги тадбирлари доирасида ҳам мудофаа саноатига оид замонавий қурол-яроғ ва ҳарбий техникалар, робототехникалар, кимё-технологиялари, кон-металлургия соҳаси ҳамда ҳарбий, икки хил мақсадга мўлжалланган махсулотлар кўргазмаси намойиш этилди.

 

Фестивалда Т-64 танкининг энг сўнгги модификацияси намойиш этилди. Шу билан бирга, маҳаллий ишлаб чиқарилган фуқаролик самолёти намойиш этилди. Яқин кунларда у савдога чиқарилиши режалаштирилган ва истаган фуқаро уни сотиб олиши мумкин бўлади. Тахминий нархи — 200 минг АҚШ доллари атрофида. Максимал тезлиги — соатига 200 км. Бу орқали мамлакатда кичик авиация ривожи янги босқичга чиқиши кутилмоқда.

 

 

 

 

Шу билан бирга, Турин Политехника университети 2-босқич талабаси, 17 ёшли Ардуино Мингафаров ўзининг роботехникага оид муаллифлик лойиҳаларини ҳам тақдим этди. Лойиҳада “Ўргимчак робот”, “Сенсорли овоз”, “Қўлга ўргатилган дрон”, "Автотўсиқ" шулар жумласидандир.

 

Дастлаб, тантанали очилиш маросимида Ўзбекистон Республикаси мудофаа вазири генерал-майор Шухрат Халмухамедов сўзга чиқиб, барча иштирокчиларни юртимизда иккинчи бор ўтказилаётган мазкур фестиваль билан қутлаб, мамлакатимиз мудофааси учун ўз ҳиссасини қўшаётган тадбиркорларга миннатдорлик билдирди. Ва фавқулотда вазиятлар натижасида бевақт оламдан кўз юмган ҳарбий хизматчиларнинг оиласи ва фарзандларига совға-саломлар улашилди, уларга яна бир бор ҳамдардлик билдирилди.

 

 

 

 

Шунингдек, кўргазма доирасида иштирокчи компанияларнинг "Б2Б" бизнес тадбирлари, яъни музокаралар ўтказилди. Ундан ташқари, фестиваль доирасида ёшлар ўртасида “Кибер спорт”, “Хакерлик устаси”, "Дастурлаш", “3Д моделлаштириш технологиялари”, “Роботлар жанги”, Учувчисиз учиш аппаратларини лойиҳалаштириш”, "Ракетамодел", "Дрон-рейсинг" ва “Келажак транспорт технологиялари робототехникаси” йўналишларида мусобақалар ўтказилади.

 

Дастурлаш ва робототехникага қизиқадиган ёшларимиз учун ушбу фестиваль ўз ғояларини рўёбга чиқариш ҳамда соҳадаги билимларини янада ривожлантириш йўлида биринчи қадам бўлади. Фестивалда саралаб олинган иқтидорли ёшлар ва фуқароларга келгусида Мудофаа саноати корхона ва заводларида ўзларининг ишланмаларини ишлаб чиқаришни йўлга қўйишлари ва ишга жойлашишлари учун кенг имкониятлар яратилади.

 

Фестиваль давомида режалаштирилган кўргазма ва мусобақалар ўзаро ҳурмат, соғлом рақобат, чинакам ватанпарварлик руҳида ўтиши ва ёрқин лаҳзаларга бой бўлиши кутилмоқда.

 

                                                                                                                              Гавҳар Зиёдуллаева, журналист