Самарқандда мактаб ўқувчилари калтакланди
Директор зўравонларга ёрдам бергани айтилмоқда.
Самарқанд вилоятининг Пастдарғом туманида жойлашган 83-сонли умумтаълим мактабида бегона шахслар томонидан мактаб ўқувчиларига нисбатан зўравонлик содир этилди. Ҳолат 29 апрель куни рўй бергани, зўравон шахслар мактаб директори орқали ўқувчи қизларни ташқарига чиқаришга эришгани ҳақида хабарлар тарқалди.
Ижтимоий тармоқларда тарқалган маълумотларга кўра, мактаб директори дарс вақтида 11-синфда ўқийдиган қизларни мактаб ташқарисига чиқарган. Шу ерда уларни Самарқанд шаҳрида яшовчи 18 ёшли фуқаро калтаклагани айтилмоқда.
Расмийлар ушбу ҳолатга муносабат билдиришмаган бўлсада, Пастдарғом тумани ИИБ ҳузуридаги Тергов бўлими томонидан тергов ҳаракатлари олиб борилаётгани тасдиқланди. Қайд этилишича, фуқаро Ўзбекистон Республикаси Жиноят кодексининг 277-моддаси 3-қисми (безорилик) билан айбланмоқда.
Маълум қилинишича, зўравонлик оқибатида мактаб ўқувчилари турли даражадаги тан жароҳатлари олган. Ҳолат юзасидан суриштирув ишлари давом этмоқда.
