Россия ТИВга Ўзбекистондан нота юборилди
Москвада ОМОН ходимлари мигрантларни уриб-тепкилаганди.
Ўзбекистон элчихонаси Россия ТИВга меҳнат мигрантларининг ҳуқуқлари бузилгани муносабати билан нота юборди.
“Ўзбекистон Ташқи ишлар вазирлиги Москвадаги рейдлар чоғида чет эл фуқароларига нисбатан жисмоний куч ишлатилгани ҳақидаги хабарларга изоҳ сўраб Россия ташқи идорасига нота юборди”, — дея маълум қилди ТИВ матбуот котиби Ахрор Бурханов.
Хабар берилишича, 10 июнь куни вазирликда Россия томони билан ҳар ой миграция масалалари бўйича ўтказиладиган навбатдаги учрашув ташкил этилган. Унда ТИВ РФ ҳудудида айрим ҳолатларда Ўзбекистон фуқароларига нисбатан рухсатсиз текширувлар, ҳурматсизлик ва қўпол муомалалар кузатилаётгани тўғрисидаги хабарлар ташвиш уйғотаётганини таъкидлаган.
Бир кун аввал Москвада ОМОН ходимлари Мудофаа вазирлигининг Строгино туманидаги муассасаларидан бирида жойлашган меҳнат муҳожирлари ётоқхонасида қаттиқ рейд ўтказган. Гувоҳларнинг сўзларига кўра, ҳуқуқ-тартибот идоралари ходимлари уларга қўпол муносабатда бўлган: эркакларни хоналаридан ҳайдаб чиқарган, секин ҳаракат қилганларни эса тепки ва шапалоқ билан туртиб чиқарган. Ёзувда муҳожирларга нисбатан ишлатилган ҳақоратли сўзларни ҳам эшитиш мумкин.
