Иқтисодий ўсиш барқарор, лекин маҳаллий муаммолар ечим кутмоқда
Яқин Шарқдаги кескинлашув минтақамизга салбий таъсир кўрсатиши мумкин.
Президент Шавкат Мирзиёев сўнгги беш ойда саноат 6,4 фоизга, экспорт 18 фоизга, хорижий инвестициялар эса 46 фоизга ошганини таъкидлади. Қиймати 3 миллиард долларлик 2,5 мингдан зиёд янги ишлаб чиқариш қувватлари ишга тушди, 2,4 миллион киши даромадли фаолият билан банд бўлди.
Шу билан бирга, Президент халқаро можаро ўчоқларининг, айниқса, Яқин Шарқдаги кескинлашувнинг минтақамизга салбий таъсири бўлиши мумкинлигини айтиб ўтди. Савдо алоқалари ва логистика йўлларининг издан чиқмаслиги учун ҳар бир раҳбар — ҳокимлар ва вазирлар — вазиятни олдиндан кўра билиб, топшириқ кутмасдан ташаббус билан ҳаракат қилиши шартлигини таъкидлади.
Давлат раҳбари маҳаллий муаммоларни ҳам очиқ танқид қилди. Масалан, Қумқўрғон марказидаги темир йўл шлагбауми 200 метрга кўчирилса, ҳар куни юзага келадиган тирбандлик бартараф этилади. Аммо бу оддий муаммони ҳал қилиш учун на туман, на вилоят ҳокимининг ваколати етади — рухсат марказдан олинади.
Шунингдек, Термиз–Сариосиё темир йўлининг ярми электрлаштирилмаганлиги сабабли, йўловчи поездлар электр ўрнига дизель локомотивларида икки баробар кўпроқ вақт сарфламоқда. Президент бу борада Транспорт вазири И. Маҳкамов ва “Ўзбекистон темир йўллари” раиси З. Нарзуллаевнинг бефарқлигини кескин танқид қилди.
