Британия Россияга янги санкциялар жорий этди
Россияга алоқадор компаниялар ва танкерлар қора рўйхатга киритилди.
Буюк Британия Россияга қарши санкцияларни янада кенгайтирди. Янги чекловлар доирасида Россия билан алоқадор 10 та компания ва жисмоний шахслар, шунингдек, 20 та нефть танкери қора рўйхатга киритилди. Бу ҳақда Британия ташқи ишлар вазирлиги тарқатган ҳужжатда маълум қилинди.
Жисмоний шахслар:
Санкциялар рўйхатига Полша фуқароси Олег Ткач ҳамда Буюк Британия ва Украина фуқаролигига эга Владимир Тутоқ киритилган. Улар Россияга электрон компонентлар етказиб беришда гумон қилинаётган Телпериен, Бомпиетро Традинг ва Саровилли Традинг каби компанияларни бошқаради.
Юридик шахслар:
- Россия Мудофаа вазирлигининг Чуқур денгиз тадқиқотлари бош бошқармаси
- Роснефт Марине (УК) Лимитед
- Орион Стар Гроуп
- Бирлашган Араб Амирликларида рўйхатдан ўтган Валегро
- Атлас акциядорлик жамияти
Молиявий ташкилотлар:
Санкциялар орасида “Металлург” номли кредит ташкилоти ҳам бор. Унга раҳбарлик қилувчи Юрий ва Егор Карасевлар ҳам чекловга учради.
Янги санкциялар тўплами Россиянинг ҳарбий имкониятларини заифлаштириш ва халқаро таъминот занжирларини издан чиқаришга қаратилган.
