Исроил фуқароларига мамлакатни тарк этишни тақиқлади
Исроилнинг асосий халқаро аэропорти ёпилган.
Исроил ҳукумати Эрон билан кескинлик ортгани сабабли ўз фуқароларига хорижга чиқишни вақтинча тақиқлади. Миддле Эаст Мониторънинг хабар беришича, бу қарор эҳтимолий хавфсизлик таҳдидларига, хусусан Эроннинг аэропортларга ҳужум қилиш эҳтимолига асосланган.
Ҳукумат маҳаллий авиакомпанияларга исроиллик йўловчиларни халқаро рейсларга қўймасликни буюрди. Исроилнинг асосий халқаро дарвозаси ҳисобланган Бен-Гурион аэропорти “кейинги огоҳлантиришгача” ёпилган. Бундай қарор хавфсизлик идораларининг аэропортларда одамлар тўпланиб қолиши ҳолатида Эрон зарбаси кўплаб қурбонларга олиб келиши мумкинлиги ҳақидаги огоҳлантиришларига асосланади.
Транспорт вазири Мири Регев: “Ҳозирги босқичда биз исроилликларнинг хорижга чиқишига рухсат бермаймиз. Ҳозир фақат чет эллик дипломатлар, сайёҳлар ва меҳмонлар мамлакатни тарк этмоқда”, — дея баёнот берди. У шунингдек, хорижда қолиб кетган 100 мингдан ортиқ исроилликни қайтариш операцияси босқичма-босқич амалга оширилишини маълум қилди.
Мазкур қарор мамлакат ичида сиёсий норозиликларни келтириб чиқарди. Миллий бирдамлик партияси раҳбари Бенни Ганс вазирнинг фикрларини қоралаб, ҳукумат халқни жазоламаслиги, балки уларнинг хавфсиз қайтишини таъминлаши кераклигини таъкидлади. Бу чора Эроннинг яқинда Машҳад аэропортига қилинган мисли кўрилмаган ҳужуми ортидан кучайтирилган хавотирлар фонида киритилган.
