АҚШ Эронни нишонга оладими?
Трамп Эрон бўйича қарорини икки ҳафта ичида қабул қилади.
АҚШ президенти Доналд Трамп Теҳрон билан ядровий дастур бўйича дипломатик музокаралар олиб борилиши эҳтимолини истисно этмади. Шунингдек, у икки ҳафта ичида АҚШ томонидан Эронга зарба берилиши ёки берилмаслиги юзасидан қарор қабул қилишини билдирди.
"Яқин келажакда Эрон билан музокаралар олиб борилиши ёки бўлмаслиги эҳтимоли мавжуд. Шунинг учун мен икки ҳафта ичида ҳаракат қилиш ёки қилмаслик тўғрисида қарор қабул қиламан", — дея Трампнинг сўзларини Оқ уй матбуот котиби Керолин Леавитт келтирган.
Унинг сўзларига кўра, Эрон ядро қуролини яратиш учун барча зарур ресурсларга эга ва бу нафақат АҚШ, балки бутун дунё учун таҳдид солади.
Аввалроқ, Axios портали Трамп маъмурияти АҚШнинг Исроил томонидан Эронга қарши бошланган ҳарбий операцияга қўшилиши мумкинлигини хабар қилган эди. Ушбу сценарийда Эроннинг ядровий иншоотларига АҚШ томонидан авиазарбалар берилиши кўриб чиқилмоқда.
Исроил 13 июнь куни Эронга қарши кенг кўламли ҳужум бошлаган, орадан бир кундан кам вақт ўтиб, Эрон жавоб ҳужуми уюштирган. Ўша кундан бери икки томон ўртасида ўзаро зарбалар давом этмоқда. Расмийлар ҳужумлар натижасида ҳалок бўлганлар ва жароҳатланганлар борлигини тасдиқлаган.
Шунга қарамай, Вашингтон дипломатик ечимга умид билдираётгани, лекин ҳар қандай вариантга тайёр экани таъкидланди.
