АҚШда бемор массаждан сўнг фалаж бўлиб қолди
АҚШлик эркак инсультдан кейин фақат кўзларини ҳаракатлантира олади.
АҚШнинг Жоржия штатида яшовчи 34 ёшли Жонатан исмли эркак бўйин оғриғини камайтириш мақсадида массаж (чиропрактик) муолажасига мурожаат қилган. Аммо муолажа унинг ҳаётини бутунлай ўзгартириб юборди — у муолажа давомида оғир инсультга учраб, тўлиқ фалаж бўлиб қолди.
Маълум қилинишича, Жонатан протседура чоғида тўсатдан ўзини ёмон ҳис қила бошлаган — боши айланган, сўнгра ҳушёр бўлишига қарамай, атрофдагиларнинг саволларига жавоб бера олмай қолган. У зудлик билан касалхонага етказилган, бироқ инсульт дарҳол аниқланмаган.
Тиббий хатоликлар ва кечиктирилган ташхис натижасида бемор “locked-in syndrome” — яъни онгли ҳолда тўлиқ фалаж ҳолатига тушиб қолган. Ҳозирда у фақат кўз ҳаракати орқали мулоқот қила олади.
Жонатаннинг оиласи чиропрактор, шифохона ва муолажада иштирок этган бир неча шифокорни судга берган. Суд қарорига кўра, икки шифокор касбий эҳтиётсизликда айбдор деб топилган ва Жонатаннинг фойдасига 75 миллион долларлик товон пули ундирилган.
