Британиялик қиз Атлантикани ёлғиз кесиб ўтиб, учта жаҳон рекордини ўрнатди
Зара Лаклан Атлантика бўйлаб 97 кун сузган.
21 ёшли британиялик Зара Лаклан эшкак эшиш қайиғида Атлантика океанини ёлғиз босиб ўтган энг ёш инсон сифатида тарихга кирди. У бир вақтнинг ўзида Гиннеснинг рекордлар китобига учта номинацияда киритилди.
Зара ўз саёҳатини Португалиянинг Лагос шаҳридан бошлаган бўлиб, 97 кун, 10 соат ва 20 дақиқа давомида эшкак эшиб, Жанубий Америкадаги Франция Гвианасининг пойтахти Каеннага етиб борди. У 7000 километрдан ортиқ масофани ўз кучи билан босиб ўтди.
Шу тариқа, Зара Атлантика океанини яккахон ва эшкак эшиб материкдан материкка кесиб ўтган биринчи аёл, шунингдек, бундай сафарни амалга оширган энг ёш спортчи ва энг ёш аёл сифатида учта жаҳон рекордига эришди.
Саёҳат мобайнида у кунига камида 17 соат эшкак эшди ва атиги 90 дақиқалик қисқа уйқулар билан чекланишга мажбур бўлди. Оғир шароитлар, ёлғизлик ва чарчовга қарамай, Зара бу синовга қатъий тайёр бўлганини айтди.
“Бу ҳамма учун эмас. Лекин мен ёшман ва оз ухлашга кўникканман”, — дея ўз таассуротларини бўлишди жасоратли спортчи.
